其實點解會俾阿仔阿女學樂器？

A. 學校要求，最少要學一樣樂器（唔計學鋼琴），乜是旦揀樣嚟學囉

B. 細個冇得學，又恨學，但年紀大，寄托係阿仔阿女身上

C. 考學校有著數

陶冶性情、增加生活樂趣（定係生活糾紛？！），真的嗎？係家長被 interview 時先會咁答，問心嗰句，有幾多父母唔係為咗ABC嘅原因而學。我呢，就貪心啲，仲有DEF嘅原因。。。

D. 希望佢有門手藝，大個就算讀書唔成都可以教吓人拉琴吹笛，應該餓唔死

E. 襯佢仲細，俾唔同嘅嘢佢地接觸，可能佢有音樂天份呢？雖然我冇。。。

F. 有篇文講過，小朋友細細個聽到嘅音域好廣，唔似大人隻耳已經死好多負責聽聲嘅細胞，細個容易啲 pick up 同辨別唔同嘅音調，尤其是天生有 absolute pitch 絕對音感嘅小朋友，如果要學音樂，就要由細細個開始，大個咗唔係唔得，不過要付出好多倍嘅努力囉

所以如果你話再次揀俾唔俾佢學樂器，我一定話 YES ，會設定一段時間，let’s say 半年一年，睇吓佢有冇興趣和天份，有就繼續學囉，冇就 bye bye，唔好浪費大家嘅時間同金錢(學樂器好鬼貴)。叉開少少，我都有觀察阿仔啲運動㗎，不過佢應該唔夠人跑，啲大肌肉麻麻地，咁就大家得閒打吓羽毛球去公園跑吓乜算囉，唔係叻嘅嘢唔好放太多精神和時間，冇乜 expectation，冇咁大壓力，要做到入校隊而又冇乜天份會好辛苦㗎。

我自己覺得，如果小朋友細細個就已經知道自己鍾意啲咩，咁咪俾佢學囉，但大部分都係成嚿飯，都係靠家長對小朋友嘅觀察，咁你物揀幾樣嘢俾佢試吓，睇吓中邊瓣咪繼續學囉。

咁點揀邊樣嘢俾佢試？

我會揀自己鍾意嘅嘢，例如我嗰兩個仔，一個學長笛，一個學小提琴，這兩樣樂器我都好鐘意的，所以叫佢地學，你要諗吓，如果佢地繼續學落去，日吹夜吹，日拉夜拉，你要頂得順先好（其實我也很喜歡大提琴，鍾意佢嗰個低音，如果有第三個仔/女，我會威迫利誘要佢學，哈哈哈）。

學咩都好，記住要俾個愉快嘅 experience 佢，又用我做例子，我對音樂係零認識，五音不全，唱K絶對唔知自己唱到錯晒拍子走晒音嗰隻，可能就係咁，佢地拉/吹咩歌都覺得好好聽，做咗佢地 fans，唔會亦唔識 comment 佢地冇音準拍子又唔啱。可能就係咁，佢地對住一個音樂白痴自自然然 build up 咗 d 無喱啦㗎嘅自信（嘩，我終揾到個唔識音樂嘅媽媽嘅好處✌🏻）。同埋，佢地一開始拉/吹到幾粒音嗰陣時，我會買幾本我自己鍾意聽嘅樂譜叫佢地拉/吹，迪士尼呀，宮崎駿久石讓呀，都係個好選擇，仲記得我自己鍾意聽 phantom of the opera 嘅 Think of Me，叫咗阿仔吹俾我聽，諗番都覺得自己好變態😅，唔駛急住練考級歌，最緊要提升佢地嘅興趣先，有興趣自然做得好。

講住咁多先，下個 blog 再同大家分享多啲。