如果 aim at 上一個 band，可以從數學入手。

大家都知呈分試各科嘅比重，應該會留意到最重要係中英數這三科，通常，中文和英文都會打散好多份卷去湊成900分，例如有閱讀、作文、聆聽，如果用中英文科去追分係會有少許吃力，要在好多份卷努力先得。但係，數學科只得一份卷，如果進步咗1分，咁呢1分會放大9倍，即900分裏面拿多9分，你諗吓，小朋友要係中英文科拿多9分唔係一件容易嘅事。相反，如果在數學科失1分，咁就冇咗900分裏面嘅9分，大拿拿9分喎，肉痛死。

再仔細諗諗，其實要在數學科拿多幾分唔係太難，首先要了解阿仔阿女嘅失分位，可以參考我哋個 blog，每編都有唔同種類嘅分析。只要在數學科進步到5分，咁即係總分裏面多咗45分，好 significant 喎，你可以問吓班主任多45分名次會高幾多。呈分試校內名次好緊要，直接影響小朋友嘅 Rank Order ，有可能中學 1st Round 有冇得 interview 都睇佢。

仲有，學校通常份數學卷唔會出得太深，因為份卷嘅分會乘9嘅關係，如果出得太深，同學仔之間嘅分數會拉得太遠，override/dominate 晒中英文科嘅分，就會攪到只有數學叻嘅人先會名列前矛，學校唔會俾呢D事情發生。咁即係話，數學卷唔會深得太離譜，有得追。

如果見到個小朋友在數學科可以有進步嘅空間，我會建議用多少少時間放係數學科，試吓執唔執到多幾分，應該可以拉高少少。

對D已考緊頭10嘅小朋友，就要 keep 住數學科要繼續好成績。