唔好以為唔識音樂就乜都做唔到，其實可以做好多嘢！

1. 安排regular嘅練習

通常我會安排做完功課温完書先練，會隔日(如果要考級就日日)練，時間唔駛長，貴精不貴多，要有質素咁練囉。最好定下每次練習嘅目標，例如要拉好個scale頭個5粒音，咁咪拉準晒5粒音先收工，不過，我都唔係次次做到，盡做啦。

2. 一齊上堂(如果可以)

佢上堂果陣時我會寫notes，抄低佢做得唔好嘅地方，例如佢去到某個位成日唔數齊拍子，咁咪係屋企練時留意吓囉。所以，佢學緊果首歌我會 copy 一份，佢上堂時睇住份 copy，mark 低俾老師執過嘅地方。

3. 扮識😏

好緊要！佢地剛剛開始學嘅時候，我會扮晒嘢執佢地啲錯處，唔識聽點執？咁就諗吓計仔囉，我果陣時智能電話未係咁普及，冇有關嘅 apps 用，咁我咪攞住個 tunner 一著黃色紅色咪知佢走音😏，數拍字咪攞住個拍子機數囉。

不過，好快佢地學到一個位我扮唔到嘢😅，咁就算啦，留番俾老師執。

我幾時唔再執佢地啲音樂嘢？就係我有一刻覺得自己係聾嘅時候囉，點聽呀，個 E sharp 咗er er，個B flat晒喎，頂，我連粒音係C定G都聽唔出啦，個 tuner 都冇做到咁細緻分到 sharp 咗 er er 同flat 咗少少，我覺得已去到啲音樂人所追求嘅 standard 時，我啲音樂白癡要行埋一二邊。

冇㗎啦，佢地學到咁嘅水平，阿媽做到嘅只係俾錢交學費，幫吓佢買弦買譜，幫佢安排吓音樂比賽、考級，鼓勵吓佢咁。

最後，都係果句，要愉快中學習，艱難唔一定係唔開心，鼓勵吓佢陪吓佢一齊做囉，做家長最緊要戒陪佢個陣時係度碌度手機睇雜誌。

苦爸苦媽們，努力呀！