除咗係一名苦媽，我另一個身分就係阿四，冇工人姐姐，工人姐姐就係我啦。因某啲原因，我由 full time 變咗做返 part time，朝頭早返完 part time，中午放工後就係我正職嘅開始，做家頭細務跟住接放學跟住處理阿仔嘅所有嘢，幾多時間都唔夠用！所以，我要諗好多辦法提高我嘅 productivity。

我個人比較抵得污糟😅，兼且做屋企啲家務實在個 priority 超低，你話啦，你會揀拖地定係陪阿仔温書？你會揀熨衫定係陪阿仔練樂器？

嗱，個地唔駛日日掃，啲塵你唔望佢你唔知嘅，多咗少少塵又有乜所謂，接受吓就得。

其實點解起身要執牀和摺被呢？除咗整齊啲仲有咩原因？我覺得整齊其中最主要原因係啲嘢容易揾得到，張被日日都係張牀度㗎啦，駛乜摺，慳返一分鐘，啲時間慳吓慳吓就見駛好多。

至於洗衫呢，我會幫阿仔買5套校服，星期六日先處理，我見有啲家長只是買兩三套，我覺得好煩呢，成日計住佢有冇校服著，落雨又驚唔乾，我覺得校服係咁多衫之中最值得買，一星期著5日喎，你邊件衫好似校服咁著得咁密？講開校服，兩個仔間中學都唔係好嚴格，只要係白色恤衫加灰色長褲就 ok，我好快就唔跟學校指定嘅校服商買校服，我覺得啲 cutting 好渣，娘都爆，所以我轉咗去幫襯金x或x龍買恤衫，佢條衫領係挺直啲嘅，著起上來個人都精神啲！校服褲呢，我就去西裝連鎖店買，價錢唔係好貴但起碼有得試到啱，我都唔知點解，跟校服商買褲，成日條褲都係唔夠長，吊晒腳，叫佢囉條長啲嚟，好似叫佢去x咁，用鄙視嘅眼光望住我好似我好唔啱要條褲咁長仲乜？！可能大家嘅standard有啲唔同，我覺得條褲要長到落腳踭先得，傳統校服商條褲掂到腳眼就得，爭咗一吋就係果一吋出事，你有時係條街度見到有啲中學生條褲吊晒腳，對白色襪若隱若現，真係娘到爆燈！我唔係要阿仔型，但最少都要正正常常，等佢知咩叫合身，校服商條褲都唔係平㗎喎，點解我唔係出邊買條啱心水？仲有，我會揀條褲係用西裝料，柔軟又舒服，唔駛點熨都好直。

講住咁多先，有機會再講吓家庭瑣碎事。