看過《富爸爸窮爸爸》這本書的人都知這是教人點樣做到財務自由，現金流，錢揾錢。。。

唔知大家有冇同感，要做到財務自由，其實都要 study 好多嘢又要睇住投資咗嘅資產，湊仔已經好鬼攰，邊有時間去了解和處理。幾年前，一來揾唔得多，二來我諗我地喜歡湊仔多過炒股投資，所以家下還是窮爸媽😅。

錢係要揾，但小朋友大得好快，眨吓眼就大個咗，所以我覺得要取個平衡，如果返工返到見唔到阿仔阿女，又或者日日將在公司的負面情緒無形中發洩係阿仔阿女身上，咁，就要停一停，諗吓是否要繼續，係唔係要轉變一下，啲錢可唔可以遲幾年先揾？定係揾少啲，自己多返啲時間同屋企人相處？不過，香港地揾食艱難，盡做啦。

雖然好多人都認同《富爸爸窮爸爸》入面講嘅嘢，但我個人覺得唔好咁快灌輸俾阿仔阿女聽，點解？只是想佢地保留一點點純潔天真嘅心，可以幻想吓自己大個做巴士司機、係雪糕店’畢’雪糕(我都做得~到~)、Cappuccino泡泡員(好以阿輝咁)😅 ，諗吓自己真正喜歡的事。

有時諗，香港人都幾可悲，好似唔買樓唔識錢揾錢一世就窮到燶，早幾年新聞有報導做醫生都要住劏房，唉~

點解環球商管係神科？點解入到 ibank 做先算成功？點解囉人地啲錢去滾到其他人啲錢就覺得好叻仔俾人捧到上天？點解香港的 engineering 變咗做水泡科？

比起一堆 Fund 佬製造出來的乜 put 乜 call 的金融衍生工具，我覺得 Google 創造的世界偉大實際得多！簡直係造福人群！一個 Google Map 的誕生已經無得頂，真心喜歡 Google 利用了 IT 做實事去便利全球的人。咁，有時諗，啲 Fund 佬，除咗玩緊啲數字遊戲，實實在在係度做咗啲咩呢？🤔

忽然諗起公司，做咗幾年嘅 IT system replacement project ，最後只是希望提供的 function 和之前的系統一樣，又為咗D咩呢。。。🤔

算把啦

腦細，冇咩事我返出去做嘢先。。。😅