我地係網誌中慢慢好詳盡咁逐一講講數學科點樣攞到100分。

咁，我又試吓俾個小貼士大家點樣可以避免啲唔記得。

有幸我兩個仔啲數學都尚算ok，小學啲數咁鬼淺，諗住佢地一定次次攞一百分啦，唉，份卷派返嚟，唔係錯哩度就錯嗰度，真係冇眼睇。

錯嗰啲嘢十居其九都係唔記得寫哩樣唔記得寫果樣，點樣可以避免？

而家就係阿爸阿媽出場嘅時候，小朋友每次派返份卷返嚟，都要研究吓佢錯咗啲咩，諗吓方法幫吓佢，舉個例子，我阿仔答數學長題目時硬係寫漏嘢，所以我俾咗個口號佢，「答題四寶」，用嚟提吓佢自己，唔該佢答長題目時自己check吓有冇齊嗰四寶先好收工。

阿仔嗰四寶係乜？

1. 題解 (佢一心一意寫條橫式和運算，成日唔記得寫題解 :~)

2. 單位 (找到個答案好開心之後忘記寫單位 :~~)

3. 答案下面嗰條雙橫線 (係，唔知點解佢成日唔鬼畫，低年級時老師會扣分 :~~~)

4. 答句 (都係，都做到個答案咯，太開心又唔記得囉 :~~~~)

不過哩招我建議只可以最多每科用一個，太多一寶二寶三寶四寶唔掂㗎，會好亂 @_@

以上哩四樣嘢係我阿仔成日唔記得寫嘅嘢，每個小朋友都有自己嘅 ‘唔記得’，靠你啦阿媽阿爸！留意吓阿仔阿女啲論盡嘢，找個合適佢嘅方法幫吓佢，大家努力呀💪🏻