有時會聽到家長朋友喺度訴苦，話阿仔阿女啲作文好唔掂，文筆差、冇內容、唔夠字，我不知幾有同感！

文筆差、冇內容、唔夠字

通常哩個情況，跟住好多老師呀中文天才同學仔啲阿媽呀就會同你講：「睇多啲書就得㗎啦，寫文自然會好。」其實哩點我都知，如果阿仔肯睇書，尤其是全本都喺中文字嘅書，咁就唔駛咁苦惱啦！佢唔鍾意睇喺迫都迫唔嚟，仲會有反效果。而且，除咗科中文佢仲有好多其他想做或要做嘅嘢，科科都話用臨瞓前15分鐘點點點就得，瞓覺前有幾多個15分鐘？又要沖涼又要擦牙洗臉，用瞓覺前15分鐘同小朋友傾吓計唔喺仲好咩？加上，如果已經知道自己個仔唔係中文科嘅材料，唔好浪費大家啲時間，針對學校想要嘅嘢，用最少嘅 effort 攪掂科中文就算啦！

攪阿仔科中文作文，我一開始時都無從入手，睇坊間啲小學作文書，好唔貼地喎，以阿仔啲程度，冇可能寫到啲咁嘅嘢，而且又唔教點樣作。唉~ 冇辦法，要自己出馬😭

點樣中文作文可以攞多啲分？

綜合幾年嘅經驗，其實又唔算太難，我自創了「作文321」的方法。簡單嚟講，篇作文最好要有

• 3 個成語 / 四字詞

• 2 個修詞技巧

• 1 個排比 / 對偶句

成語 / 四字詞：最好用學校剛剛教嗰啲，懶喺學以致用咁。

修詞技巧：比喻、擬人、誇張、設問、反問等等，會加分。

排比 / 對偶句：主要用嚟湊夠字數，對小學生嚟講，掗字一流。

保持冷靜，保持冷靜，保持冷靜

通常我要阿仔作咗第一個 draft 先，對住阿仔篇 draft，點差都好，都要保持冷靜，保持冷靜，保持冷靜（重要嘅嘢要講三次），慢慢同佢修正，最好參考好嘅句子，改少少，用自己學緊嘅四字詞形容詞，咁篇文就好好多㗎啦。

講開好嘅句子，又賣吓廣告先，本網頁都會賣我以前同阿仔一齊作嘅作文，比起坊間嘅作文書貼地，大家可以用嚟作個參考，不過就唔好抄文啦，好容易俾人捉到㗎。