我唔係數學天才，我D仔女亦唔係數學天才，只係對數學比較敏感，佢地亦冇慧根冇興趣做數學家，但經過家長同小朋友努力後，佢地小學階段數學攞滿分，玩奧數有獎攞下。家長努力其實係好重要。正如「成功男人背後都有一個好老婆」一樣道理，成功嘅小學生，背後都有位好堅毅嘅媽咪。最好加埋個好學嘅爹哋。

我被好多家長問過，想仔女數學再好D，家長可以點做？講得多之後，個仔間小學直頭搵我講講座，同其他家長分享下個仔學習數學嘅過程。

當我留意到個仔對數學比較敏感後，就希望佢數學科測考攞滿分，讀深D，玩奧數等。

但係測考攞滿分完來都唔易。家長認真試下計時攞小朋友份卷做一次就知。

之後發覺，原來方間冇咩書或資源教家長點樣幫仔女數學再好D。

大家最簡單嘅，當然就係買補充練習畀仔女做、迫佢地補習。但搵適合嘅練習同埋適合嘅補習，都可能唔易。

但係如果家長能力時間應付到，仔女在小學階段，家長可以做呢 d：

• 嚴格要求數字要寫得好
• 直式對位一定要齊
• 迫佢地抄數落下一行要習慣核對一次
• 剪低計錯嘅數，印多幾次，要重做到啱為止 (之係 Error book 嘅概念)
• 自己學完再教佢地
• 如果家長覺得未必應付到子女嘅數學，家長可陪伴佢地溫習，心理上給予支持及鼓勵。而陪伴時切忌囉唆，應營造一個靈靜及冇騷擾嘅環境。
• 睇一D講學習數學嘅書 (明白呢類書係好難搵，努力搵下，我都買到D呢類書嘅，不過呢類書嘅對象一定唔係家長。我未見過一本講數學學習嘅書對象係家長。)
• 睇完書，睇完仔女計錯數，努力想想點樣避免 (呢個 blog 嘅嘢，好多就係咁樣嚟嘅)

每個家長都有自己嘅限制，在合理範圍內努力過，仔女最後攞咩分數，可能都係天意，唔好畀自己太大壓力。