香港高小嘅家長一定對哩堆 magic number 有認識，冇錯，就係香港小學呈分試升中嘅計分方法。

其實哩堆數字代表緊咩？就係小學五六年級呈分試各科計分佔嘅比重，即

中文科佔900分

英文科佔900分

數學科佔900分

常識科佔600分

視藝科佔300分

音樂科佔200分

共3800分

家長們，你地會點睇哩啲分？

我嗰陣時第一樣嘢諗到就係 ‘攞得一分得一分’！而家諗返都覺得自己有啲變態😅，不過，有時就係果一兩分令到全級名次跌咗幾名，影響到小朋友嘅 rank order。

我相信好多家長會明白我當時嘅心情，除非你係聽天由命嗰個style，一般嘅家長，未必知自己個細路屬於邊個 band，就算知，又驚個個同學仔開始發力自己嗰件不進則退被跌落下個 band；如果較叻嗰啲，又要爭頭10(最少)咁先至係1st round top 中學自行分配學位有啲把握。

我係一個緊張大師，希望能夠將risk降至接近零，所以，我會佈署安排好每科要得到佢 max 嘅分。(所以，不好意思，體育科呀聖經科呀係放任式處理，minimum standard 要合格😅)

首先，要睇吓自己個仔邊樣掂邊樣唔多掂。

掂果啲就繼續好似之前嘅温書方法，再分析吓阿仔阿女弱嘅地方，加多少少訓練就夠。例如我個仔，佢地數學強，但總有唔小心嘅地方，咁就要分析吓係唔小心啲咩，（其實唔小心太攏統，要針對性去改善，大家可以參考我地 ‘數學科’ 的blog。)

唔掂果啲，就要策略性惡補，或者試吓用其他方法，例如 short term memory 短暫記憶嘅方法，又或者用另一個思維去令到佢識/記得，遲啲再係blog到同大家分享多啲。

不過，對於小朋友唔鍾意嘅科目，我自己覺得要諗諗取個平衡，俾更多嘅時間落佢唔鍾意又吃力嘅地方，對個細路好痛苦。即係咁，如果你唔鐘意讀西史，但有人迫你每日讀一個鐘仲要考你考到識為止，你會點？

講開又講，我細仔係中文白癡，但又要考DSE，入U要3322 (即中文最少要攞3)，咁，咪試吓用最少嘅時間和心力，目標攞3咪算囉 (我好相信佢將來以level 3嘅中文都應該生存到)，如果要佢一個星期用10個鐘(唔計返學時間) 先會進步到攞到4，我覺得浪費咗佢啲時間，我寧願佢俾多啲時間落佢有把握和有天份(有機會5**)嘅科目，目標為本，拿個3和拿個4對佢入U有冇影響？咁當然，如果要靠個4入U就另當分別論。我自己認為，唔好俾個迷思影響，點解每一科都要拿高分？科科叻就冇所謂啫，但對於好多小朋友，其實拿高分係要付出好多努力和時間，都係有限的。

好，下個blog分享吓我以前和小朋友小五小六每科點應對😉