又到考試季節，苦媽苦爸們加油！努力！

今次想分享一下以前同阿仔點度過考試，啲學校好鐘意星期四五一二咁考，橫跨兩個星期，有好有唔好，咁係有多啲時間分開兩個禮拜温習，但就苦了全家兩個星期六日都要乖乖留係屋企陪太子仔太子女讀書。

點樣部署這兩個禮拜，遲啲再係個 blog 講，今次想提苦爸媽們考試期間千祈唔好喪鬧阿仔阿女（雖然有時都忍唔住鬧爆咗佢），咁樣只不過係自己情緒嘅發洩，所以，為咗有個愉快嘅心情，我會在考試天帶阿仔去食個美味午餐先返屋企温習。有時佢學校好鬼早就考完試放學，仲趕得切食早餐，果下都幾開心，係，唔好意思，我係講緊我。。。因我最鍾意食早餐，一來平啲，二來個份量細啲，早餐啲嘢又好味又冇咁 heavy ，啱晒。叉開咗少少添，我想講嘅係 suggest 你找個放鬆自己的事同阿仔一齊做，食個早餐又得，買件好味嘅蛋糕食又得，鍾意食蛋撻可以買定兩個温書 break 果陣時食又得，就當獎勵吓自己咁鬼辛苦同阿仔温習，對自己好啲啲。

最近放假陪阿仔考試，同佢去食 Mos Burger，佢仲記得小學考試果陣時好開心去食 lunch（因我會俾佢揀食邊間餐廳，麥記，KFC，XX冰室，佢係好興奮嘅），我諗都算係佢愉快嘅童年回憶吧~

雖然哩啲唔係啲咩大嘢，只係生活的小細節，但小朋友係會記得同開心嘅。

嗱，開心咗先，派卷返嚟先再鬧。