咁我會諗俾零用錢佢係為咗乜?
1. 俾佢小息買嘢食
2. 佢自己可以買鍾意嘅嘢
3. 試吓俾少少錢佢用,開始學習理財
我每天都會準備茶點俾佢地帶返學,而且有個學校冇零食賣,所以佢地啲零用錢主要係用嚟買佢地想要嘅嘢。果陣時,我每日俾一個一蚊佢地做零用錢(一蚊易數又易計),買個小錢罌,要佢自己入落個錢罌到,我係專登要用實物嘅,咁先可以形象化整件事,摸到睇到數到係好重要。另外,最好一開始時 regular 啲咁俾,即係如果每日沖完涼俾就沖完涼俾,等佢預計到幾時有錢收,即好似出糧咁,遲一日出糧你都鬼晒咁嘈啦,同埋,咁佢可以預計到將來會有幾多 income,咁佢地先會識 planning。
大仔第一樣用零用錢買嘅嘢係乜?
就係 Mr. Happy哩本書,果輪佢忽然好鍾意睇 Little Miss & Mr系列嘅書,帶佢地行Page One (唉~ 執咗啦😢) ,佢話要用零用錢買書,果吓真係感動到喊,零用錢用來買書喎,(不過到咗中學就用晒啲錢嚟買 figure 🤦🏻♀️,死宅男) 我應該會開心一世。
一日一蚊嘅日子慢慢變成5蚊一個禮拜,(因為佢阿媽我覺得好煩,日日找大餅俾佢地),再大吓大吓就變咗係 google drive 個 excel 自己 mark 數。
你又試吓揾一套適合阿仔阿女嘅方法,讓佢地有愉快學習理財嘅第一步!
下一篇我會講吓有咩嘢俾零用錢時父母係唔可以做,請留意。