要提醒吓家長們，對於零用錢，有幾點係唔可以做。

❌ 鍾意俾就俾，唔鍾意就唔俾

如果想阿仔阿女有一個良好嘅理財第一步，我建議是要定時定額咁俾，例如每星期日臨瞓前俾嚟緊嗰個星期嘅零用錢，咁就 keep 住個個星期咁做，咁佢地先可以有預期嘅收入，咁佢地先可以有 well planning。千祈唔好股票升心情靚塞幾舊俾仔女，打麻雀贏錢先俾零用錢，咁會俾佢地覺得零用錢要望天打掛，存有僥倖嘅心態，天降橫財係要學點處理，但基本嘅理財概念都未有，都係一步一步來吧，先教識佢係有預期嘅收入下去計劃點樣先至得到自己想要嘅嘢。仲有，千祈唔好心軟，見佢想要嘅嘢要蓄成幾個月先買到就俾啲額外津貼佢，要忍，咪由得佢蓄到為止囉。

曾經聽過有啲阿爸同仔女出街，如果有現金找續，啲散紙懶得袋順手俾咗啲仔女就算。我覺得簡直就係教壞晒，一來驚佢有樣學樣，二來真係擔心佢會群住啲有錢人睇吓有冇油水可以揩，咁就真係 oh no 啦！

❌ 用嚟作呈罰

「你再唔聽話就罰你冇零用錢！」好熟口面啊呵。千祈唔好！咁你就會間接俾咗個訊息阿仔阿女原來佢唔聽話嗰樣嘢是同錢掛鈎，咁即係 ‘聽話’ 先有零用錢，家長們，等一等，聽話唔係小朋友要學習嘅嘢？唔係要用道理去說服佢聽話？咁而家好似用錢來令佢地屈服，阿爸阿媽，唔好吓吓用錢達人先得架。相反，小朋友唔希罕你啲零用錢，係唔係可以唔聽話先😏。仲有，你知唔知，小朋友嘅後台——四大長老，實力雄厚，我建議你都係早啲教佢正確嘅理財態度好過啦。

❌ 鬧 / comment 佢用零用錢買返嚟嘅嘢

「嘩！你仲咩用零用錢買埋啲冇謂嘢？」你點唔鍾意都好，都唔好俾哩啲說話佢聽，你嘅角式係引導佢，教佢咩叫做值，咩係嘥錢，點樣喺有限嘅資源用得其所，將你認為正確嘅理財慢慢一步一步教俾小朋友知。

咁，咩係冇謂嘢？一串魚蛋係唔係冇謂嘢？一個膠公仔係唔係冇謂嘢？一張閃咭係唔係冇謂嘢？一個LV袋係唔係冇謂嘢？iPhone 12 係唔係冇謂嘢？ 大家得閒諗諗😏